भविष्य
म आज बेचैन छु ।
तिमीलाई तत्काल देख्न/छुन नपाउँदा
सुन्छु,
क्षितिज पारि अग्लिरहेछौ
पलपलमा वर्तमान भई पग्लिरहेछौ
र, थाहै नपाइ/भोग्नै नपाइ
तत्कालै, क्षणक्षणमा, भूतसँग सङ्लिरहेछौ ।
रे ! खै ? होला ! हुन्न होला, जस्ता अनिश्चयका
शंकाको भुङ्ग्रोमा छाडेर
कति तड्पाउँछौ तिमी मलाई
पलपलमा र किस्ताकिस्तामा नआइदेउ न !
सिङ्गै साक्षात्कार बन, मेरो भविष्य
तब म ग्वाम्लाङ्ग अंगालो मार्न सकूँ ।
