बिलासी नवाफ
बनारसका नवाफ एकदमै बिलासी थिए । उनको यो कमजोरी देखेर उनको राज्य बृटिश आक्रमणकारीले शुरुमै हडप्ने योजना बुने । नवाफले आफूलाई बृटिशले आक्रमण गर्दैछन् भन्ने कुरा अघि नै सुइँको पाइहालेछन् । तसर्थ उनले बृटिशको शिकार हुनुभन्दा भाग्ने योजना बनाएछन् । भाग्ने सबै तयारी पूरा भइसकेपछि बाहिर निस्कँदा उनले देखे कि उनको जुत्ता त उल्टो पो फर्केको रहेछ ! उनले आफैले जुत्ता छुन नमिल्ने भएकोले त्यो जुत्ता सुल्टाइदिन नोकरचाकरहरुलाई धुइँधुइँति खोज्न थाले । नोकरहरु आफ्नो ज्यान जोगाउन पहिल्यै भागिसकेका थिए । यसर्थ जुत्ता सुल्टाइदिने कोही पनि भएनन् । अतः उनको भाग्ने योजना तुहिन गयो र बृटिशका आक्रमणकारी आएर नवाफको सजिलैसंग हत्या गरिदिए । बनारसबासीले नजिकैबाट देखे कि उनका नोकरचाकर भागेकै कारण बनारसका नवाफ बृटिशका शिकार हुन पुगे ।
