होक्काँ
नजिकैको ढिस्कोमा सिङौरी खेल्दै
अघिल्ला दुई खुट्टाले पालैपालो खोस्रिँदै आफूमुनिको जमिन
धुलाम्मे पार्दै वरिपरिको वातावरण
जुरो हल्लाउँदै पुच्छर बटार्दै
कसैलाई
हाँक दिइरहेको छ मैमत्त साँढे
उसका कुकृत्यदेखि त्रसित बाच्छाहरु
पाखा लागिदिन्छन् ऊदेखि
कहिले पाटामुनि पछारिन्छन्
कहिले ढिस्कोमा जीउ थापिदिन्छन्
र बित्थैमा रक्ताम्य पार्छन् आफ्नो जीउ
न चरण चर्न पाउँछन्
न पानी पिउन पाउँछन्
न अघि लाग्न पाउँछन्
न पछि पर्दैमा सुख पाउँछन्
त्यस्सै त्यस्सै झम्टिमाग्छन्
होक्काँ ! होक्काँ !
प्रतिद्वन्दी साँढेले दोहोलो नकाढेसम्म उसको
बाच्छाले पाइरहन्छन् बिनसित्तिको दुःख ।
