सानो मान्छे
लाग्न थाल्यो सानो छाति चेप्टिएको जस्तो
छोटो छोटो पातलो नाक नेप्टिएको जस्तो
डल्लोडल्लो गोरोगोरो रुपै कस्तो कस्तो
बाउआमाको अनुहारै खप्टिएको जस्तो ।
मुसुमुसु मुस्कुराउँछौ आँखा जुध्दा तिमी
ढुङ्गो खोज्दा देवता नै भेटिएको जस्तो ।
दुःख पीडा भुलाइदिन्छौ सँगै हुँदा तिमी
धारा खोज्दा पानीतिर्खा मेटिएको जस्तो ।
नबुझिने मीठो स्वरले के के भन्छौ कुन्नि
सारङ्गीमा मीठो धुन रेटिएको जस्तो ।
जे जे हुन्छ राम्रै होवस् छिट्टै बढ्दै जानू
झिक्न खोज्दा भागमै घीऊ घोप्टिएको जस्तो ।
