परिशीलन, यो के बनायौ ?

  • देवकुमारी ओली

 

बाबु, परिशीलन !! हामीलाई छोडेर कहाँ हरायौ ?

त्यो जुनेली रातलाई किन यो औँसीको रात गरायौ ?

हामीलाई आँशुको भयानक सागरमा डुबायौ !

हाम्रो सपना र विपना  नछुट्टिने यो के बनायौ ?

 

तिम्रो अकल्पनीय बिछोडको त्यो कालो दिन अगाडि

तिमीले नै यो संसारका हरेक वस्तु अमृततुल्य बनायौ !

तिम्रो बिछोडको त्यो कालो दिन पछाडि

यो संसारका हरेक वस्तु विषतुल्य ? यो के बनायौ ?

 

तिम्रो कुभलो चिताउने वा यो बिछोड तुल्याउने

जो जो थिए तिनीलाई यो रमाइलो संसार किन दिलायौ ?

तिम्रो सदा भलो र उत्तरोत्तर प्रगति चिताउने

जो जो छन् तिनीलाई नै अँध्यारो संसार ? यो के दिलायौ ?

 

बाबु, यही नै स्वर्ग थियो हाम्रो लागि, किनकि

तिमीले नै हाम्रा चिन्ता, भय र दुःख सारा भगायौ !

बाबु, यही नै नर्क भयो हाम्रो लागि किनकि

चिन्ता, भय र दुःखको भेलले घेरिने, यो के बनायौ ?

 

आऊ है बाबु ! हामीले के गर्‍यौँ भने तिमी फर्कन्छौ ?

या तिमीले पुनर्जन्म लिएर कुन घर उज्यालो गरायौ ?

आामा बरबराउँदी, बाबु निशब्दः, दिदी, भाइ तिम्रा

कारकको खोजीमै भौँतारिने, तिमीले यो के गरायौ ?

 

बाबु, परिशीलन !! हामीलाई छोडेर कहाँ हरायौ ?

त्यो जुनेली रातलाई किन यो औँसीको रात गरायौ ?

हामीलाई आँशुको भयानक सागरमा डुबायौ !

हाम्रो सपना र विपना  नछुट्टिने यो के बनायौ ?

 2,383 total views,  1 views today

Leave a comment

Your email address will not be published.


*